2026 ජනවාරි 18 වනදා රාත්රිය අප්රිකානු පාපන්දු ඉතිහාසයේ රන් අකුරින් පමණක් නොව, කඳුළින් සහ මතභේදයෙන්ද ලියැවුණු රාත්රියකි. රබාත් නුවර ‘ප්රින්ස් මවුලේ අබ්දල්ලා’ ක්රීඩාංගණය දස දහස් සංඛ්යාත ප්රේක්ෂකයින්ගේ ඝෝෂාවෙන් දෙදරුම් කමින් තිබුණි. තරගයේ මිනිත්තු 90ක් අවසන් වන විට ලකුණු පුවරුව 0-0ක් ලෙස සටහන් වුවද, නියමිත කාලයේ අතිරේක මිනිත්තු කිහිපය (Stoppage Time) තුළ දිග හැරුණේ කිසිවෙකුත් අපේක්ෂා නොකළ නාටකීය සිදුවීම් මාලාවකි.
තරගයේ 96 වන මිනිත්තුවේදී මුළු ක්රීඩාංගණයම නිහඬ කරමින් සෙනගාල් ක්රීඩක ඉස්මයිලා සාර්, නිවැරදි ඉලක්කයට එල්ල කළ පන්දු යොමු කිරීමක් හිසින් පහර දී දැල තුළට යොමු කළේය. සෙනගාල් ක්රීඩකයින් සහ bench එකේ සිටි සියල්ලෝම ජයග්රාහී ප්රීතියෙන් උමතු වී සිටියහ. නමුත් ඒ සතුට පැවතියේ තත්පර කිහිපයක් පමණි. විනිසුරු විසින් එම ගෝලය අවලංගු කළේ පන්දුව ලබා ගැනීමේදී සෙනගාල් ක්රීඩකයෙකු විසින් මොරොක්කෝ ආරක්ෂක ක්රීඩකයෙකුට බාධා කළ බව පවසමිනි. එය අතිශය ‘මෘදු’ සහ මතභේදාත්මක තීරණයක් ලෙස විචාරකයින් හැඳින්වූ අතර, සෙනගාල් ක්රීඩකයින්ගේ මුහුණු වල දිස්වූයේ දැඩි අසරණභාවයකි.
සෙනගාල් කණ්ඩායම තවමත් සිය අවලංගු කළ ගෝලය ගැන කම්පනයෙන් පසුවෙද්දී, තරගයේ 98 වන මිනිත්තුවේදී මොරොක්කෝවේ බ්රහීම් ඩියාස් සෙනගාල් සීමාව තුළ ඇද වැටුණි. VAR පරීක්ෂාවකින් පසු විනිසුරු විසින් මොරොක්කෝවට දඬුවම් පහරක් (Penalty) පිරිනමන ලදී. සෙනගාල් ක්රීඩකයින් විනිසුරුව වට කරමින් විරෝධය දැක්වූයේ පන්දුවට එල්ල කළ බාධාව ඉතා අවම මට්ටමක පැවති බව පවසමිනි. ක්රීඩාංගණය තුළ උණුසුම උපරිමයට පත් වූ අතර, එය තවදුරටත් පාපන්දු තරගයකට වඩා යුධ පිටියක ස්වරූපය ගත්තේය.
විනිසුරුගේ අසාධාරණ තීරණ වලට විරෝධය දැක්වීමක් ලෙස, සෙනගාල් පුහුණුකරු පාපේ තියව් සිය කණ්ඩායමට පිටියෙන් ඉවතට යන ලෙස නියෝග කළේය. මෙය මුළු මහත් පාපන්දු ලෝකයම මවිතයට පත් කළ අවස්ථාවකි. සෙනගාල් ක්රීඩකයින් පිරිසක් ක්රීඩාගාරය දෙසට ගමන් කරද්දී, පිටිය මැද නිලධාරීන් සහ ක්රීඩකයින් අතර ගැටුම්කාරී තත්ත්වයක් ඇති විය. තරගය අතහැර දැමුවහොත් නීත්යානුකූලව මොරොක්කෝව ජයග්රාහකයන් ලෙස ප්රකාශයට පත් කිරීමට ඉඩ තිබූ බැවින්, එය සෙනගාල් පාපන්දුවේ අඳුරුතම මොහොත වීමට ඉඩ තිබුණි.
මෙම අර්බුදකාරී මොහොතේ සැබෑ පරිණත ක්රීඩකයෙකු ලෙස නැගී සිටියේ සදියෝ මනේ ය. ඔහු ක්රීඩාගාරය දෙසට ගිය සිය සගයන් පසුපස දිව ගොස්, ඔවුන්ගේ අතින් අල්ලා සන්සුන් කර නැවත පිටියට කැඳවාගෙන ආවේය. “අපි දිනන්න ඕනේ සෙල්ලම් කරලා මිසක්, පරාජය භාරගෙන නෙවෙයි” යන ඔහුගේ අධිෂ්ඨානය සගයන්ගේ සිත් තුළට කා වැදුණි. මනේගේ එම මැදිහත්වීම නොවන්නට, 2025 AFCON කුසලානය සෙනගාල් කණ්ඩායමට අහිමි වීමට තිබුණේ පිටිය මැදදී නොව, ක්රීඩාගාරයේ දොරටුව අසලදීය.
මිනිත්තු 15ක පමණ ප්රමාදයකින් පසු තරගය නැවත ආරම්භ විය. මුළු ක්රීඩාංගණයම හුස්ම අල්ලාගෙන සිටියේ බ්රහීම් ඩියාස් පෙනල්ටි පහර එල්ල කරන තෙක්ය. ඔහු තෝරා ගත්තේ අතිශය අවදානම් සහගත ‘පානෙන්කා’ (Panenka) පහරකි. පන්දුව සෙමින් මැදට යොමු වෙද්දී, සෙනගාල් ගෝල රකින්නා වූ එඩුවාඩ් මෙන්ඩි කිසිදු චකිතයකින් තොරව එම පන්දුව සුරැකිව රැකගත්තේය. එය සෙනගාල් කණ්ඩායමට නව පණක් ලබා දුන් අතර, මොරොක්කෝවේ ජයග්රාහී බලාපොරොත්තු සුනුවිසුනු කළ මොහොතක් විය.
නියමිත කාලය 0-0ක් ලෙස අවසන් වී තරගය අතිරේක කාලයට (Extra Time) පිවිසියේ සෙනගාල් කණ්ඩායම මානසිකව විශාල ජයග්රහණයක් ලබා සිටියදීය. එහිදී පාපේ ගුවේ එල්ල කළ සුපිරි ගෝලයත් සමඟ සෙනගාල් කණ්ඩායම 1-0ක ජයක් ලබා සිය දෙවන අප්රිකානු කුසලානය දිනා ගැනීමට සමත් විය. මෙම අවසන් මහා තරගය පාපන්දු ක්රීඩාවේ පවතින උද්යෝගය මෙන්ම, නායකත්වයේ සහ අධිෂ්ඨානයේ අගය ලොවටම කියා දුන් අමතක නොවන පාඩමක් විය.
