2026 මාර්තු 07
ඊශ්රායලය සහ ඇමරිකාව ඒකාබද්ධව ඉරානයට එරෙහිව ආරම්භ කළ යුද මෙහෙයුමට මේ වනවිට දින 8ක් ගතව ඇති අතර, මැදපෙරදිග කලාපයේ ආරක්ෂක තත්ත්වය තවදුරටත් උත්සන්න වෙමින් පවතින බව විදෙස් මාධ්ය වාර්තා කරයි.
මෙම ගැටුම් හේතුවෙන් කලාපයේ රටවල් කිහිපයක ගුවන් ආරක්ෂක පද්ධති ක්රියාත්මක කර ඇති අතර, ගුවන් තොටුපොළ මෙහෙයුම්, තෙල් කර්මාන්ත හා සන්නිවේදන පද්ධති ද දැඩි ලෙස බලපෑමට ලක්ව ඇත.
ලෙබනනයේ මරණ සංඛ්යාව ඉහළට
ලෙබනන සෞඛ්ය අමාත්යාංශය පවසන්නේ යුද ගැටුම් හේතුවෙන් එරට තුළ මේ වනවිට පුද්ගලයින් 294 දෙනෙකු මියගොස් ඇති බවය.
එමෙන්ම තවත් 1,023 දෙනෙකු තුවාල ලබා ඇති බව ද සඳහන් වේ.
ඉරානයේ නව උත්තරීතර නායකයා තෝරා ගැනීමේ සූදානම
ඉරානයේ නව Supreme Leader වරයා පැය 24ක් ඇතුළත තෝරා ගැනීමට ඉඩ ඇති බව එරට Assembly of Experts මණ්ඩලයේ සාමාජිකයෙකු උපුටා දක්වමින් Fars පුවත් සේවය වාර්තා කරයි.
කෙසේ වෙතත්, එම ක්රියාවලිය සිදුවන අතරතුර අනුමාන කිරීම් වලින් වැළකී සිටින ලෙස මහජනතාවගෙන් ඉල්ලා ඇත.
කලාපයේ රටවල් රැසකට මිසයිල සහ ඩ්රෝන ප්රහාර
ගැටුම් උත්සන්නවීමත් සමඟ කලාපයේ රටවල් කිහිපයකට මිසයිල සහ ඩ්රෝන ප්රහාර වාර්තා වී තිබේ.
කටාර් රාජ්යය ඉලක්ක කර එල්ල වූ මිසයිල ප්රහාරයක් එරට ආරක්ෂක අංශ විසින් මැඩපවත්වන ලදී.
බහරේනයේ ජුෆෙයාර්හි පිහිටි ඇමරිකානු හමුදා කඳවුරක් ඉලක්ක කරමින් ඉරානය මිසයිල ප්රහාරයක් එල්ල කළ බව වාර්තා වේ.
සෞදි අරාබිය ප්රින්ස් සුල්තාන් ගුවන් කඳවුර ඉලක්ක කර එල්ල වූ බැලස්ටික් මිසයිල දෙකක් විනාශ කළ බව ද එරට ආරක්ෂක අමාත්යාංශය පවසයි.
ඊශ්රායලයට ඉරාන ප්රහාර – ගුවන් ආරක්ෂක පද්ධති ක්රියාත්මක
ඉරානයෙන් ඊශ්රායලය දෙසට මිසයිල ප්රහාර එල්ල වන බව ඊශ්රායල ආරක්ෂක බලකාය පවසයි.
ඒ අනුව එල්ල වූ තර්ජන මැඩපවත්වීමට ගුවන් ආරක්ෂක පද්ධති ක්රියාත්මක කර ඇති අතර, ජනතාවට ආරක්ෂිත ස්ථාන වෙත යාමට උපදෙස් දී තිබේ.
හිස්බුල්ලා සහ ඊශ්රායලය අතර ගැටුම්
ලෙබනනයේ ක්රියාත්මක හිස්බුල්ලා සංවිධානය ඊශ්රායලයේ Dado හමුදා කඳවුර ඉලක්ක කරමින් මිසයිල ප්රහාරයක් එල්ල කළ බව ප්රකාශ කර තිබේ.
ඊට ප්රතිචාර ලෙස ඊශ්රායල හමුදාව දකුණු ලෙබනනයේ සහ බෙකා නිම්නයේ පිහිටි හිස්බුල්ලා අවි ගබඩා සහ රොකට් විදින ස්ථාන ඉලක්ක කර ප්රහාර මාලාවක් දියත් කර ඇති බව සඳහන් වේ.
ගුවන් ගමන් සහ තෙල් කර්මාන්තයට බලපෑම්
ගැටුම් හේතුවෙන් මැදපෙරදිග ගුවන් ගමන් සේවාවලටද දැඩි බලපෑම් එල්ල වී තිබේ.
ඩුබායි ජාත්යන්තර ගුවන් තොටුපොළ මෙහෙයුම් තාවකාලිකව අත්හිටුවා පසුව නැවත ආරම්භ කර ඇත.
බහරේන් ජාත්යන්තර ගුවන් තොටුපොළ ද කාලයකට වසා දමා තිබුණි.
කටාර් එයාර්වේස් සීමිත ගුවන් ගමන් පමණක් ක්රියාත්මක කිරීමට තීරණය කර ඇත.
එමෙන්ම, ආරක්ෂක අවදානම් හේතුවෙන් ඉරාකයේ තෙල් නිධිවල සේවය කරන විදේශීය සේවකයින් ඉවත් කිරීම විදේශීය තෙල් සමාගම් ආරම්භ කර තිබේ.
ට්රම්ප්ගේ අනතුරු ඇඟවීම
ඇමරිකානු ජනාධිපති ඩොනල්ඩ් ට්රම්ප් පවසන්නේ ඉරානයට එරෙහි මෙහෙයුම් “ඉතා සාර්ථකව” සිදුවන බවයි.
ඔහු සඳහන් කළේ පසුගිය දින තුන තුළ ඉරාන නාවික හමුදාවට අයත් නෞකා 42ක් විනාශ කර ඇති බවත්, එරට සන්නිවේදන සහ ගුවන් හමුදා පද්ධති ද අඩපණ කර ඇති බවත්ය.
ඉරානයේ සන්නිවේදන පද්ධති අඩපණ
පෙබරවාරි 28 දින ඉහළ පෙළේ ඉරාන නායකයින් ඉලක්ක කර සිදු වූ ප්රහාරයෙන් පසුව එරට අන්තර්ජාල සහ සන්නිවේදන පද්ධති දැඩි ලෙස බිඳ වැටී ඇති බව NetBlocks දත්ත පෙන්වා දෙයි.
Source – Ada derana
