ශ්රී ලංකාවේ මාධ්ය ක්ෂේත්රයට නව පියවරක්..
වරලත් මාධ්ය වෘත්තිකයන්ගේ ආයතනයක් පිහිටුවීමට ගැසට් නිවේදනයක් එයි.
ශ්රී ලංකාවේ මාධ්ය වෘත්තිය වඩාත් වෘත්තීයමය හා ප්රමිතියෙන් යුත් ක්ෂේත්රයක් බවට පත් කිරීමේ අරමුණින්, “ශ්රී ලංකා වරලත් මාධ්ය වෘත්තිකයන්ගේ ආයතනය” (Chartered Institute of Media Professionals of Sri Lanka) පිහිටුවීමට අදාළ පනත් කෙටුම්පත රජය විසින් ගැසට් කර තිබේ.
කැබිනට් මණ්ඩල ප්රකාශක හා ජනමාධ්ය අමාත්ය නලින්ද ජයතිස්ස මහතා මේ බව අනාවරණය කළේ අද (09) රජයේ ප්රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්ය හමුවේදීය.
අමාත්යවරයා සඳහන් කළේ මෙම ආයතනය මාධ්යවේදීන්ගේ වෘත්තීය දැනුම, කුසලතා සහ ආචාරධර්මීය ප්රමිතීන් ඉහළ නැංවීම සඳහා ස්වාධීන ආයතනයක් ලෙස ක්රියාත්මක වන බවයි. එමඟින් මාධ්ය ක්ෂේත්රයට වඩාත් සංවිධානාත්මක හා වෘත්තීයමය ව්යුහයක් හඳුන්වා දීමට අපේක්ෂා කෙරේ.
මෙම පනත් කෙටුම්පත සකස් කිරීමේදී ක්ෂේත්රයේ නියුතු මාධ්යවේදීන්, ප්රමුඛ මාධ්ය ආයතන, ජනමාධ්ය විෂය ඉගැන්වෙන විශ්වවිද්යාල අංශවල ආචාර්යවරුන් ඇතුළු පාර්ශ්ව රැසකගේ අදහස් හා යෝජනා ලබාගෙන ඇති බවද හෙතෙම පැවසීය.
ශ්රී ලංකා මාධ්ය ඉතිහාසයේ පළමු වරට වෘත්තීය මට්ටමේ වරලත් ආයතනයක් පිහිටුවීම සඳහා මෙලෙස නීතිමය පියවර ගෙන තිබීම විශේෂ සිදුවීමක් ලෙස සැලකේ.
දැනට ගැසට් කර ඇති මෙම පනත් කෙටුම්පත සම්බන්ධයෙන් ඉදිරියේදී ලැබෙන යෝජනා සහ අදහස් අනුව අවශ්ය සංශෝධන සිදු කිරීමේ හැකියාව පවතින බව ද අමාත්යවරයා වැඩිදුරටත් සඳහන් කළේය.
විශේෂඥයින්ගේ මතය අනුව, මෙම ආයතනය ස්ථාපිත වීමෙන් ශ්රී ලංකාවේ මාධ්යවේදීන්ට ජාත්යන්තර මට්ටමේ වෘත්තීය පිළිගැනීමක් ලබා ගැනීමට මෙන්ම වගකීම් සහගත මාධ්ය සංස්කෘතියක් ගොඩනැගීමට ද වැදගත් දායකත්වයක් ලැබෙනු ඇත.
www.slmediahub.com
#media
#mediaprofessional
#MediaEthics
#slmediahub
#media2026
