2026 FiFA ලෝක කුසලානය ඇරඹෙද්දී අවධානයට ලක් වූ අපූරු වාර්තාවක්..
වසර 96ක් තිස්සේ බිඳ නොවැටුණු සම්ප්රදාය මෙවර වෙනස් වෙයිද?
ලොව විශාලතම ක්රීඩා උළෙලක් ලෙස සැලකෙන FIFA පාපන්දු ලෝක කුසලාන තරගාවලියේ නවතම අදියර ආරම්භ වීමට නියමිතව තිබියදී, පාපන්දු ලෝලීන්ගේ අවධානය දිනාගත් අපූරු ඉතිහාසගත කරුණක් පිළිබඳව මේ දිනවල පුළුල් ලෙස කතාබහට ලක්වෙමින් තිබේ.
ඒ, 1930 වසරේ පළමු ලෝක කුසලාන තරගාවලියෙන් ආරම්භ වී 2022 කටාර් ලෝක කුසලානය දක්වා පැවති සෑම ලෝක කුසලාන ශූර කණ්ඩායමක්ම තමන්ගේම රටේ ජාතික පුහුණුකරුවෙකු යටතේ ශූරතාව දිනාගෙන තිබීමයි.
වසර 96ක ලෝක කුසලාන ඉතිහාසය තුළ එක් වරක් හෝ විදෙස් ජාතික පුහුණුකරුවෙකු මෙහෙයවූ කණ්ඩායමක් ලෝක ශූරයන් වී නොමැති වීම පාපන්දු ඉතිහාසයේ විශේෂ සම්ප්රදායක් ලෙස සැලකේ.
ලෝක කුසලාන ශූරයන් සහ ඔවුන්ගේ ජාතික පුහුණුකරුවන්
1930 – උරුගුවේ – ඇල්බර්ටෝ සුපිචි (උරුගුවේ)
1934 – ඉතාලිය – විටෝරියෝ පෝසෝ (ඉතාලිය)
1938 – ඉතාලිය – විටෝරියෝ පෝසෝ (ඉතාලිය)
1950 – උරුගුවේ – හුවාන් ලෝපෙස් ෆොන්ටානා (උරුගුවේ)
1954 – බටහිර ජර්මනිය – සෙප් හර්බර්ගර් (බටහිර ජර්මනිය)
1958 – බ්රසීලය – විසෙන්ටේ ෆියෝලා (බ්රසීලය)
1962 – බ්රසීලය – අයිමොරේ මොරෙයිරා (බ්රසීලය)
1966 – එංගලන්තය – ඇල්ෆ් රැම්සි (එංගලන්තය)
1970 – බ්රසීලය – මාරියෝ සගාලෝ (බ්රසීලය)
1974 – බටහිර ජර්මනිය – හෙල්මුට් ෂෝන් (බටහිර ජර්මනිය)
1978 – ආර්ජන්ටිනාව – සීසර් ලුයිස් මෙනොට්ටි (ආර්ජන්ටිනාව)
1982 – ඉතාලිය – එන්සෝ බෙයර්සොට් (ඉතාලිය)
1986 – ආර්ජන්ටිනාව – කාර්ලෝස් බිලාර්ඩෝ (ආර්ජන්ටිනාව)
1990 – ජර්මනිය – ෆ්රාන්ස් බෙකන්බවර් (ජර්මනිය)
1994 – බ්රසීලය – කාර්ලෝස් අල්බර්ටෝ පරෙයිරා (බ්රසීලය)
1998 – ප්රංශය – ඒමේ ජැකේ (ප්රංශය)
2002 – බ්රසීලය – ලුයිස් ෆෙලිපේ ස්කොලාරි (බ්රසීලය)
2006 – ඉතාලිය – මාර්සෙලෝ ලිප්පි (ඉතාලිය)
2010 – ස්පාඤ්ඤය – විසෙන්ටේ දෙල් බොස්කේ (ස්පාඤ්ඤය)
2014 – ජර්මනිය – යෝකිම් ලෝව් (ජර්මනිය)
2018 – ප්රංශය – ඩිඩියර් ඩෙශාම්ප් (ප්රංශය)
2022 – ආර්ජන්ටිනාව – ලියොනල් ස්කලෝනි (ආර්ජන්ටිනාව)
අවසන් මහා තරගයට පැමිණි විදෙස් පුහුණුකරුවන් දෙදෙනෙක් පමණයි
ලෝක කුසලාන ඉතිහාසයේ අවසන් මහා තරගයට විදෙස් ජාතික පුහුණුකරුවෙකු මෙහෙයවූ කණ්ඩායමක් පැමිණීම ද අතිශය දුර්ලභ සිදුවීමකි.
1958 වසරේ ස්වීඩන කණ්ඩායම එංගලන්ත ජාතික ජෝර්ජ් රේනර්ගේ නායකත්වයෙන් අවසන් තරගයට පැමිණි අතර, 1978 වසරේ නෙදර්ලන්ත කණ්ඩායම ඔස්ට්රියානු ජාතික අර්න්ස්ට් හැපල්ගේ මෙහෙයවීමෙන් අවසන් තරගයට සුදුසුකම් ලබා ගත්තේය. එහෙත් එම කණ්ඩායම් දෙකම ශූරතාව දිනාගැනීමට සමත් වූයේ නැත.
2026 දී ඉතිහාසය වෙනස් වෙයිද?
මෙවර ලෝක කුසලානයේදී වසර 96ක් තිස්සේ පැවති මෙම සම්ප්රදාය බිඳ වැටීමේ හැකියාව පිළිබඳවද විශාල අවධානයක් යොමුවී තිබේ.
විශේෂයෙන්ම ඉතාලි ජාතික කාර්ලෝ අන්චෙලොට්ටිගේ නායකත්වය යටතේ බ්රසීලයත්, ජර්මානු ජාතික තෝමස් ටුකල්ගේ නායකත්වය යටතේ එංගලන්තයත් මෙවර තරගාවලියේ ප්රබල අපේක්ෂකයන් ලෙස සැලකේ.
එම කණ්ඩායම්වලින් එකක් හෝ ශූරතාව දිනාගතහොත්, FIFA ලෝක කුසලාන ඉතිහාසයේ ප්රථම වරට විදෙස් ජාතික පුහුණුකරුවෙකු ලෝක ශූර කණ්ඩායමක් මෙහෙයවූ අවස්ථාව ලෙස එය වාර්තාගත වනු ඇත.
2026 ලෝක කුසලානය තවත් එක් ශූරයෙකු බිහිකිරීමට සූදානම් වන මොහොතේ, පාපන්දු ලෝලීන් දැන් බලා සිටින්නේ වසර 96ක් පුරා නොබිඳුණු මෙම අපූරු ඉතිහාසගත වාර්තාව තවදුරටත් පවතින්නේද, නැතිනම් මෙවර එය අවසන් වන්නේද යන්න දැන ගැනීමටය.
www SLMediaHub.com
#FIFA
#FIFAWorldCup2026
#FIFAWorldCup
#fifacomunity
#slmediahub
