සමාජ මාධ්ය ඇබ්බැහිය සම්බන්ධයෙන් Meta සහ Google වගකිව යුතු බවට ඓතිහාසික අධිකරණ තීන්දුවක්..
ඇමරිකාවේ ලොස් ඇන්ජලීස් අධිකරණයක ජූරි සභාවක් විසින් සමාජ මාධ්ය භාවිතය නිසා තරුණයන්ගේ මානසික සෞඛ්යයට සිදුවන බලපෑම් සම්බන්ධයෙන් ඓතිහාසික තීන්දුවක් ලබා දෙමින් Meta සහ Google සමාගම් වගකිව යුතු බව තීරණය කර තිබේ.
මෙම නඩුව පවරා තිබුණේ වයස අවුරුදු 20ක් වන කේලි (Kaley) නම් තරුණියක් විසිනි. ඇය චෝදනා කර තිබුණේ කුඩා අවධියේ සිට Instagram සහ YouTube භාවිතයට ඇබ්බැහි වීම හේතුවෙන් තමන්ගේ මානසික සෞඛ්යයට බරපතළ හානි සිදු වූ බවයි. නඩුව විභාග කළ ජූරි සභාව Meta සහ Google සමාගම්වල වේදිකා සැලසුම් කිරීමේ සහ ක්රියාත්මක කිරීමේ ක්රමවේදයන් එම හානියට සැලකිය යුතු ලෙස දායක වී ඇති බවට තීරණය කර ඇත.
අධිකරණය විසින් පැමිණිලිකාරියට ඇමරිකානු ඩොලර් මිලියන 6ක වන්දියක් නියම කර ඇති අතර, එයින් ඩොලර් මිලියන 3ක් සාමාන්ය වන්දි ලෙසත් ඉතිරි ඩොලර් මිලියන 3 දඬුවම් සහගත වන්දි ලෙසත් නියම කර ඇත. වන්දියෙන් සියයට 70ක කොටස Meta සමාගම විසින්ද, සියයට 30ක කොටස Google සමාගම විසින්ද ගෙවිය යුතු බවට නියෝග කර තිබේ.
නඩු විභාගයේදී හෙළි වූ තොරතුරු අනුව, කේලි වයස අවුරුදු 6දී YouTube භාවිතය ආරම්භ කර ඇති අතර, පසුව Instagram භාවිතයටද යොමු වී තිබේ. ඇය දිනකට පැය ගණනාවක් මෙම වේදිකාවන්හි ගත කර ඇති අතර, එහි ප්රතිඵලයක් ලෙස කාංසාව, විෂාදය සහ body dysmorphia වැනි මානසික සෞඛ්ය ගැටලුවලින් පීඩා විඳ ඇති බව නඩුවේදී ඉදිරිපත් වී ඇත. පැමිණිලිකාර පාර්ශ්වය තර්ක කර තිබුණේ “infinite scroll” සහ “autoplay” වැනි විශේෂාංග පරිශීලකයන් දිගු කාලයක් වේදිකාවල රඳවා තැබීම සඳහා හිතාමතා සැලසුම් කර ඇති බවයි.
කෙසේ වෙතත්, Meta සහ Google සමාගම් මෙම තීන්දුව ප්රතික්ෂේප කර ඇති අතර, අභියාචනයක් ඉදිරිපත් කිරීමට සැලසුම් කරන බව ප්රකාශ කර තිබේ. Meta සමාගම සඳහන් කර ඇත්තේ නව යොවුන් වියේ මානසික සෞඛ්යය ඉතා සංකීර්ණ කරුණක් වන අතර එය එක් යෙදුමක් හෝ වේදිකාවක් මත පමණක් පැවරිය නොහැකි බවයි. Google සමාගම ද YouTube යනු වගකීම් සහගතව ගොඩනගා ඇති වීඩියෝ ප්රවාහන සේවාවක් බව අවධාරණය කර ඇත.
විශ්ලේෂකයන් පෙන්වා දෙන්නේ මෙම තීන්දුව දැනට ඇමරිකාවේ විභාග වෙමින් පවතින සමාජ මාධ්ය සමාගම්වලට එරෙහි තවත් නඩු දහස් ගණනකට බලපෑම් කළ හැකි බවයි. එම නිසා මෙම නඩුව තාක්ෂණික සමාගම් සහ මහජනතාව අතර සබඳතාවයේ වැදගත් හැරවුම් ලක්ෂ්යයක් ලෙස සැලකෙයි.
මේ අතර, ළමුන්ගේ සහ නව යොවුන් වියේ පසුවන්නන්ගේ සමාජ මාධ්ය භාවිතය සීමා කිරීම සඳහා ඕස්ට්රේලියාව, එක්සත් රාජධානිය ඇතුළු රටවල් කිහිපයක් දැනටමත් නව නීති සහ නියාමන ක්රියාමාර්ග හඳුන්වා දී ඇති අතර, මෙම තීන්දුවත් සමඟ ලොව පුරා සමාජ මාධ්ය නියාමනය පිළිබඳ විවාදය තවත් උණුසුම් වනු ඇතැයි අපේක්ෂා කෙරේ.
www SLMediaHub.com
#meta
#google
#courtcase
#slmediahub
#viralnews
