“වයිෆ්” සිනමාපටය ජයග්රාහී දින 100 පසුකරයි
ශ්රී ලාංකේය සිනමා ක්ෂේත්රයේ මෑත කාලයේ වැඩි අවධානයක් දිනාගත් “වයිෆ්” සිනමාපටය ජයග්රාහී දින 100 සම්පූර්ණ කිරීමට සමත්ව තිබේ. දින 100ක් අඛණ්ඩව තිරගත වීම ශ්රී ලංකා සිනමා කර්මාන්තයේ විශේෂ ජයග්රහණයක් ලෙස සැලකෙන අතර, එම සාර්ථකත්වය පිළිබඳව චිත්රපට අධ්යක්ෂ ශමීර නාඔටුන්න සිය සමාජ මාධ්ය ඔස්සේ අදහස් පළ කර ඇත.
ඔහු සඳහන් කර ඇත්තේ, “වයිෆ්” චිත්රපටය නිර්මාණය වූ අවස්ථාවේදී විවිධ අභියෝග රැසකට මුහුණ දීමට සිදු වූ බවයි. ඇතැම් ප්රදර්ශන මණ්ඩලවලින් ප්රතික්ෂේප වීම, ජාතික චිත්රපට සංස්ථාවෙන් ප්රමාණවත් සහායක් නොලැබීම මෙන්ම ප්රබල ප්රචාරණයක් සහිත “ධර්ම යුද්ධය” සහ “ෆාදර්” වැනි චිත්රපට අතරතුරදී මෙම චිත්රපටය නිකුත් කිරීම විශාල අවදානමක් වූ බවද ඔහු පෙන්වා දී තිබේ.
කෙසේවෙතත්, සියලු බාධක මධ්යයේ ප්රේක්ෂක ආදරය සහ සහයෝගය හේතුවෙන් චිත්රපටය සාර්ථක කර ගැනීමට හැකි වූ බව ශමීර නාඔටුන්න ප්රකාශ කරයි. “වයිෆ්” නැරඹීම සඳහා ටිකට්පත් මිලදී ගෙන සිනමාශාලාවලට පැමිණි සියලු ප්රේක්ෂකයන්ට ඔහු විශේෂ ස්තුතිය පළ කර තිබේ.
මෙම චිත්රපටයේ ප්රධාන චරිත සඳහා දායක වූ හේමාල් රණසිංහ සහ උදාරි වර්ණකුලසූරිය පිළිබඳවත් ඔහු විශේෂයෙන් සඳහන් කර ඇත. “වයිෆ්” ඔවුන්ගේ සිනමා ජීවිතයේ වැදගත් හැරවුම් ලක්ෂ්යයක් බවද ඔහුගේ අදහසයි.
චිත්රපටයේ නිෂ්පාදක වරුණ අරඹගේ සමඟ කළ දෙවන නිර්මාණය “වයිෆ්” බවත්, ඔවුන්ගේ පළමු චිත්රපටය වූ “සිහින නෙළුම් මල්” ද දින 108ක් තිරගත වූ බවත් අධ්යක්ෂවරයා සිහිපත් කර තිබේ.
එමෙන්ම, චිත්රපටය ප්රදර්ශනය වූ කාලය තුළ ඇතැම් සිනමාශාලා හරහා මූල්ය අක්රමිකතා සිදුව ඇති බවත්, ඒ සම්බන්ධයෙන් නීතිමය ක්රියාමාර්ග ගෙන ඇති බවත් ඔහු සඳහන් කරයි.
“වයිෆ්” චිත්රපටයේ සාර්ථකත්වයෙන් පසුව ඉදිරියේදී නව සිනමා නිර්මාණ කිහිපයක් කිරීමට සැලසුම් කර ඇති බවත්, “වයිෆ් 2” චිත්රපටයක්ද නුදුරු අනාගතයේදී නිර්මාණය විය හැකි බවත් ශමීර නාඔටුන්න වැඩිදුරටත් පවසා ඇත.
www.slmediahub.com
මුලාශ්රය – Shameera Naotunnna Facebook page
